Wer wir sind

Wie jedes Jahr semmer au im November 2015 als Zueschauer as legendäre Jahreskonzert vom Männerchor Chünte.
Vill vo eusne Vättere oder Grossvättere singed oder händ mal gsunge i dem Wahnsinns Chor.

Nachem Uftritt hocket sich de Markus Staubli und na paar ander a euse Tisch und schwärmed wie schön dass es wäri eus Junge im Chor ufzneh. Afangs hemmer alli dankend abglehnt. Mer chan doch ned als junge 18-Jährige uf e Bühni stah und imene Männerchor singe. Die Rechnig hemmer ohni eusem Fründ, em liebe Bier, gmacht. Nach öppe drü Bestächigsrundene hemmer nüm chönne ablehne.

Es knapps Jahr spöter hed eus de Markus de wieder agsproche wemmer de mal id Prob chämmted. Uf einisch heds eus packt und mer hend Idee gsammlet und Konzept entwicklet.

A eusem Gründigsdatum (sprich Erstelldatum vom Whatsapp-Chat) am 05.08.2016 hemmer nüün motivierti Gsangsbanause und zwei geduldigi Chorleiter binenand gha.

De Markus Staubli und Stephan Widmer hend sich die monumental Ufgab gstellt, eus i wenige Probe uf de eimalig Uftritt am Jahreskonzert 2016 vorzbereite.
Am 11. Und 12. November 2016 hemmer eusi Premiere vor voller Halle dörfe fiire.
Zu eusere Überraschig heds ned nur am Publikum, sondern au eus gfalle.

Die Woche druf hemmer zwei Afroge becho. En Geburtstag und en Uftritt ade grosse Badefahrt. Nach churzem Überlegge isch entschiede gsi: s Projekt gaht witer und zwar bis a dem Tag wo eus keine meh will ghöre.
Sed denn hemmer zahlrichi Uftritt gha. Vo Zufike über Birrhard bis Bade und sogar is Bündnerland händs eus scho bstellt. Grücht behauptet sogar i eusem "gliebte" Nachbersdorf Stette sigemer scho zgseh gsi.

S Keyboard vom Stephan isch denn scho nach em erschte Jahr dur s Örgeli vom Dario und em Marcel ersetzt worde. Mit durchschnittlich einere Prob pro Uftritt schaffemers immer no, drü bis vier neui Lieder pro Jahr z lerne. Dur Zuewachs chömemer mittlerwiele uf 12 Sänger. Hüt chömmer stolz behaupte, dass mer die dritti Formation vom Männerchor Künten sind, wo eus tatchräftig unterstützt.