Über uns

Über uns: Wer semmer, was mached mer und wieso eigentlich. Alles das Erfahrsch do.

Wie jedes Jahr semmer au im November 2015 als Zueschauer as legändere Jahreskonzert vom Männerchor Chünte ga luege.

Velli vo eusne Vättere oder Grossvättere singed oder händ mal gsunge i dem wahnsinns Chor.


Nachem Uftritt hocket sich de Markus Staubli und na paar ander a euse Tisch und schwärmed wie schön dases weri eus junge im Chor ufzneh. Afangs hemmer alli dankend abglehnt. Mer chandoch ned als junge 18-jährige uf en Bühni stah und imene Männerchor senge. Die Rechnig hemmer ohni eusem Fründ, em liebe Bier, gmacht. Nach öppe drü Bestächigsrundene hemmer nüm chönne ablehne.


Es knapps Jahr spöter hed eus de Markus de weder agsproche wemmer de mal id Prob chömmed. Uf einisch heds eus packt und mer hend Idee gsammlet und Konzept entwicklet.


A eusem Gündigsdatum, sprich Erstelldatum vom Whatsapp-Chat, am 05.08.2016 hemmer nüün motivierti Gsangsbanause und zwei geduldigi Chorleiter binenand gha.


De Markus Staubli und Stephan Widmer hend sich die monumental Ufgab gstellt, eus i wenige Probe uf de einmalig Uftritt am Jahreskonzert 2016 vorzbereite.

Am 11. Und 12. November 2016 hemmer eusi Premiere vor voller Halle dörfe fiire.
Zu eusere Überraschig heds ned nur am Publikum, sondern au eus gfalle.


Die Woche druf hemmer zwei Afroge becho. En Geburtstag und e Uftritt ade grosse Badefahrt. Nach churzem überlegge esch entschide gsi, das Projekt gaht witer und zwar bes a dem Tag wo eus keine meh well ghöre.
Sed denn hemmer zahlrichi Gigs gha. Vo Zufike über Birrhard bes Bade und sogar is Bündnerland hends eus scho bstellt. Grücht behauptet sogar in Stette segemer scho zgseh gsi.


Au zwei witeri mitglieder hemmer chönne günne und s Keyboard vom Stephan esch langsam dur s Örgeli vom Dario und em Marcel ersetzt worde. Met durchschnittlich einere Prob pro Uftritt schaffemer doch no drü bes vier neui Lieder pro Jahr z lerne. Hüt chömmer stolz behaupte, mer send die dretti Formation vom Männerchor Künten wo eus tatchräftig unterstützt.

Copyright @ All Rights Reserved